الثلاثاء، 2 يونيو، 2009

من غش فليس منا........









الحالة في البلد صحيح زفت وهباب وكل العبر السودة فيها لا أنكر... وغالبا المسؤلين هما السبب في كل البلاوي.. بس أنا مش هاتكلم على المسؤلين والحكومة كالعادة... ولا من هم أقل درجة زي الموظفين الصغيرين الي لسا في أول السكة وكل لما تروحلهم في مصلحة يفتحوا الدرج وإن ما فهمتش يقولك خليك فهيم وكع ....ومتنساش الحلاوة... وأكرمنا نكرمك ....!

وكلام من ده . بصراحة لسه ما دخلتش في العالم ده لسه يعني سنة سنتين بالكتير وأجرب زيي زي غيري... ومش هاتكلم على مصايب جامعتنا والدكاترة الي خلاص شوية ويتنقلوا على المتحف القومي كأثر من أيام الفراعنة ... ولا الدكتور الي غير أسئلة الأمتحان وإحنا في اللجنة عشان الأسئلة جاءت من خارج المنهج....!

... هاتكلم علينا إحنا جيل المستقبل...أمل بكرة.. إحنا الآن والأمس والغد... يعني وشوية الأغاني الوطنية دي والأسطوانة المشروخة الي تقريبا كلنا حافظينها...من أولى إبتدائي إلى الجامعة... بحيث إن في فرع في العائلة الكريمة بيشتغل في التدريس ... وشايف ما شاء الجهود العظيمة المبذولة في إخراج جيل فاااااااااااااااااااالح جدااااااااااااا. .......................لو في حد زكي شوية هيعرف أنا هاتكلم على ايه......؟طبعا على المجهود الكبير المبذول في تعليم جيل النشئ أهمية التطنيش والتفويت ومذاكرة ايه الي أنت جاي تقول عليها... والبراشيم أفضل وسيلة للنجاح....!

ومعقولة ياميس تقفلي على العيال وتمنعيهم من الغش ...طب عقابا ليكي تقعدي أمن على باب المدرسة إلى أن تنتهي الإمتحانات.......!

وآثارالمجهودات العظيمة دي الظاهرة علينا في الجامعة... تلاقي ماشاء الله لاحول ولا قوة إلا بالله ثلاثة أرباع الدفعة بينهم تعاون غير عادي... وتحس إن هما هيفتحوا مالطة مش هيغشوا في الأمتحانات... كل مجموعة مقسمين المواد على بعض ..كل واحدة واخدة فصل ولا فصلين من الكتاب تظبطوا براشيم والحاجات الغريبة دي ... وياسلام لو جالهم مراقب جامد شوية ومعرفوش يغشوا منه... تلاقي بعد الإمتحان دعوات نازلة زي المطر ... وتلاقي الي تقولك منه لله ... "والله هيقعدلوا في عيالي"... وكلام من العينة دي وأحيانا والله بشوف مراقبين يقولوعلى زمايلهم.. ياعيني معقدها عليهم كده ليه. دا أنتم زي ولادنا... حرام...! وكلام فاضي من ده...








وطبعا مبنقولش لبعض غش لا دا مساعدة عند البعض...والبعض الآخر يقولك تسهيل طلب علم ...وكل واحد مسمي الغش أسم...
وبجد بجد الغش عندنا في الكلية هذا العام موجود بشكل كبير جداااااااااااااااااااا...


أكيد طبعا أغلبنا عارفين قول الرسول صلى الله عليه و سلم : ( من غش فليس منا)
من غش...المقصود بيها كل أنواع الغش يعني مش في البيع والشراء بس ... والنتيجة حسب الحديث إن الغشاش ليس منا... مين إحنا لو في حد مش عارف والله الرسول هو قائل الحديث يبقى هو تبرأ من الغشاش...يبقى إحنا مين؟
شئ آخر والله فعلا متخيلتش أن الغش يكون سبب للذنوب دي منها مثلا... إن مجرد التفكير في الغش يعني التخلي عن أهم صفة المفروض موجودة في طالب العلم .. الإخلاص لله لأ ن معنى التفكير في الغش إن هم الغشاش الدرجات فقط ... مش بيطلب علم لوجه الله حتى لو علم مش ديني ...ويبقى الكام حديث الي إحنا دائما ما بنقولهم لبعض في الكلية مش منطبقين علينا.. زي قول الرسول صلى الله عليه وسلم: " مَنْ سَلَكَ طَرِيْـقـَاً يَلْتَمِسُ فيْهِ عِلْمَاً سَهَّلَ اللهُ لهُ به طَرِيْقاً إلى الجَنَّةِ "وقول الرسول صلى الله عليه وسلم " مَنْ خَرَجَ في طَلَبِ العِلْمِ فهو في سَبِيْلِ اللهِ حتى يَرْجِعَالمصيبة أن ممكن الغشاش يقع تحت المذكورين في الحديث قال صلى الله عليه وسلم ( من تعلم علما مما يبتغي به وجه الله لا يتعلمه إلا لغرض نمن الدنيا زائل ، لم يرح رائحة الجنة ) . وغير كده إن الشهادة التي سيحصل عليها الغشاش باشا أكيد طالما الغش حرام فهي كمان حرااااااااااااااااااااام.. وبالتالي أي ناتج منها سواء وظيفة "على أمل إن إحنا هنشتغل بشهايدنا يعني" أو غيرها وبالتالي أي دخل عن طريقها أعتبر بعض العلماء إن هو حرام... وبالتالي حضرة الغشاش باشا وأسرته المستقبلية الكريمة ووظيفته المستقبلية ...وكل شئ ترتب على الشهادة دي هيعتبر مال حرام
وطبعا طبعا طبعا.... الغش خيانة أمانة..خيانة للدكتور لأن هو طبعا واضع للإمتحان على أساس المنهج وعلى أساس جهد ولو كان بسيط قام به أثناء الدراسة...وأكيد هو رافض موضوع الغش...خيانة للمراقب لأن وظيفته وواجبه أن يمنع الغش زي ما وظيفتي أنا أني أذاكر وأحل مش أغش... وخيانة للنظام التعليمي حتى لو نظام فاشل زي الحاصل معانا الآن.. لأنه رغم فشله مش قائم على الغش ... وآخر حاجة أنه خيانة للأمة.. لأن الأمة مش محتاجة مدرس ولا دكتور ولا محاسب ولا.. غشاش لأن مستواهم بالتالي هيؤدي لأنحدار حالنا للأسفل أكثر وأمتنا الآن محتاجة من يرفعها وينهض بيها...محتاجة المتميزين فعلا ..
في ناس تانية مش هاقول عليهم حاجة غير إن هما طيبين ..مش بتغش لأ بتغشش بس...مش بقول ناس طيبة "الله يسامحهم" مش واخدين بالهم إن هما سهلوا حرام وظلموا أنفسهم لأنهم أعانوا على معصية وبالتالي زيهم زي فاعلها في الذنب...
وبعدين تعالى ياطيب فكر كده مش أنت هتكون سبب إن حضرت الغشاش يكون عايش في حرام على أساس إن شهادته ترتب عليها مال ورزق وزواج ووو وكله جاء من طريق لا يرضى عنه الله .
لسه نقطة تانية والله أنا مبعملهاش لأني ما كنتش واخدة بالي ...بس بإذن الله هاعملها...
أن إحنا بنشوف الغش ونطنش مع إن المفروض الساكت عن الحق شيطان أخرس... والمفروض من رأى منكرا فليغيره بيده فإن لم يستطع فبلسانه فإن لم يستطع فبقلبه وذلك أضعف الإيمان....
وطبعا السادة المراقبين الله يكرمهم ...والله بتغاظ من بعضهم بشكل... تلاقي البعض ييجي يقولنا .. ماتعملوش إزعاج وساعدوا بعض في هدوء... وكلام من العينة دي... ويبقى فاكر نفسه عمل خير وثواب وإن هو كسب له دعوتين حلوين... مش واخد باله إن هو كمان خان الأمانة في عمله ...
وأكيد مش من حق المراقب إن هو يحلل حرام ولا يحرم
حلال ...
أثر الغش علينا والله هو واضح جدا بداية من الفضائح الكبيرة خالص في البلد... وأنتهاءا بالمصايب الصغيرة .. من فساد ورشاوي مش باينة لسه في أول السكة ..أكيد بدأت بضعف المراقبة الواضح عند الغشاشين ومن عاونهم طبعا... وأكيد لو كل بني آدم أستشعر وجود الله وإن ربنا رقيب عليه كان حال البلد هيفرق جدا... أكيد ماكانش الحال هيبقى كده... وأكيد إنتشار الغش بداية على سكة الفساد المستقبلي لأنه بيغرس فينا وفي إخواتنا الصغيرين إن أسهل الطرق هو الحرام ...وإن عشان تعمل حاجة أو توصل لحاجة فأخسن الطرق وأسهلها طريق الغلط ...وبالتالي منتوقعش أبدا أي تغيير في المستقبل لحالتنا ...لأن إحنا بنبني الجيل الجديد على كده... ومنلومش على الحكام والمسؤلين فسادهم لأن إحنا نعتبر عينة صغيرة منهم...وأكيد كل حرامي من الحرامية الكبار الآن كان غشاش... وبجد عايزين نغرس الحكاية دي في الجيل القادم ولادنا وأخواتنا الصغيرين ...عايزين نفتكر إن هما بجد هيغيروا لو أتربوا على أسس صحيحة... عايزين ناخد بالنا إن كما تكونوا يولى عليكم... وعايزين ناخد بالنا إن إنتشار الغش ده بيشير لضياع الأمانة وأنقلاب الموازين وإنتشار الباطل وأكيد بيؤدي لإسناد الأمور لغير أهلها ودي إحدى علامات الساعة.... يعني خلاص قربنا جدا يبقى المفروض نخلي ختامها مسك وربنا يستر...

و طولت جدا المرة دي ..فسامحوني......

هناك 12 تعليقًا:

  1. أولا جزاكى الله خيرا على هذا الموضوع الرائع
    ثانيا:إللى بيغش دا بيخدع نفسة وبيخون الامانة وإللى بيتعود على كدا ممكن يغش فى أى حاجة مش شرط إمتحان وبيبقى نواة لفساد كبير فى المجتمع
    بس لو كل واحد استشعر معنى الله شاهدى الله ناظرى الله مطلع على أعتقد انو مجرد التفكير فى الغش مش هيجى فى باله. كفاية انه لما يجيب النتيجة يحس فعلا ان دا مجهودة مش مجهود حد تانى اما لو كانت النتيجة دى بالغش هيحس انو صغير قوى قدام نفسة.
    تحياتى

    ردحذف
  2. السلام عليكم

    اخيتي دودي ..

    للأسف انها ليست أمة من امم الكفر ، انما أمة خير البشر أمة الإسلام ، انتشرت فيها عادة الغش فاصبحت شيئاً طبيعياً لدى الطالب في شتى مراحل دراسته
    وما يزعجك ايضاً أنه اذا طلب منك طالب آخر سؤال ولم ترضى ان تعطيه الاجابة ربما ينزعج منك ويعاتبك أيضاً .؟!

    أختي لا أعرف ما المشكلة هنا في مدونتك ، أحاول الدخول بإسم بحر الإبداع ، لكن لا أجد طريقة للدخول بها الى مدونتك..

    بارك الله فيك اختي وجزاك الله خير الجزاء
    دمت بخير

    ردحذف
  3. أزال المؤلف هذا التعليق.

    ردحذف
  4. أختي همسة...وجزاكي الله خيرا أنت أيضا على مرورك وتعليقك الرائع وحقا يجب علينا أن إحنا نجعل شعارنا الله شاهدى الله ناظرى الله مطلع على وليس شعار فحسب بل تطبيق جزاكي الله خيرا ونورتيني...

    ردحذف
  5. بحر الأبداع جزاك الله على مرورك ... ومعك والله حق ..الناس الآن أصبحت تعتبر الغش أمر مسلم به وعيب ومصيبة لولم تساعدهم..يعني تغششههم أنشاء الله تكون المشكلة أتحلت...ونورتني وجزاك الله خيرا

    ردحذف
  6. السلام عليكم

    حياك الله اختي وبارك الله فيك
    بالفعل تم حل المشكلة
    جزاك الله خير ما جزا به عبد من عباده
    دمت بخير

    ردحذف
  7. شكلك مخنوقه جدا من حالات التعاون البناء الجميل
    التى يطلقون عليها ظلما ً ( غش ّ )
    يا أخت دودى
    الإسلام حس ّ بشده على التعاون

    ( وتعاونوا على البر والتقوى )

    وهل هناك بر ّ أكثر من أن يؤثر الفرد أخاه بمذاكرته
    هذا من قوة الإيمان لقد آثر الصحابه إخوانهم
    بكل ما يملكون
    وانت مستكبره على العيال إنهم يؤثرون بعضهم ( بالبراشيم ) حرام كفايه كده
    دا انت لما تبقى مدرسه العيال هيكرهوكى كره

    اعتقد إننى أنفع سوفسطائى كبير صح

    ( رجاء ممكن تكبرى خط الكتابه بعد كدة انا عينى اتعمت لحد مخلصت قراءة )
    مقاله جميلة

    ردحذف
  8. أخي أديب ... جزاك الله خير على مرورك ...ووالله يعني هي وجهة نظر سوفسطائية..بس إن شاء الله قائلها مش سوفسطائي ..وبالنسبة للخط والله بنسى أكبره بس هاكبره بإذن الله...

    ردحذف
  9. السلام عليكم

    اختى دودى
    بالنسبه لموضوع الرشوه والمحسوبيه ..كنت قرأت فى اخر تقرير للشفافيه وهو تقرير تخرجه الام المتحده سنويا ليصف دول العالم المختلفة من حيث درجة الشفافية في التعاملات المالية والإدارية والسياسية وغيرها في البلد،
    لكى ان تتخيلى مصر جاءت فى التريب 111بدرجه2.8من 10 وده ان دل يدل على مدى الفساد والتردى الاخلاقى التى تعيش فيه البلد


    وبالنسبه لموضوع الغش

    فى حديث بجد لابد ان يكون لنا وقفه فى قوله صلى الله عليه وسلم:"من حمل علينا السلاح فليس منا، ومن غشنافليس منا"
    يعنى تخيلى من حمل السلاح على المسلمين ومن غش وقفوا الاثنين فى خانه واحده


    ربنا يعافى مجتمعاتنا من هذه الافه التى انتشرت وبقت تتسمى بمسميات مختلفه لتحسين صورة الغش
    وبقت زى ما ذكرتى اختى الحبيبه ثقافة مجتمع ((يعنى اللى مش يغش هو اللى مش طبيعى او هو اللى غلط ))

    جزاكم الله خيرا ...وأعانكم الله وفقكم فى امتحاناتكم ..

    دمتى فى طاعة الله .

    ردحذف
  10. أختي نور الإسلامأ..نورتيني وبعدين طلعلنا ترتيب في حاجة في العالم ...بجد حسبنا الله ونعم الوكيل وللأسف الفساد مش مقتصر على طبقة الحكام ولا أصحاب المال...بالعكس منتشر في كل طبقات المجتمع....
    والحديث الي أنت قلتيه فعلا صعب جدا لأنه بيساوي بين من يحمل على المسلمين وبين الغشاش ...وبجد ممكن نحس بالتناسب بينهم لأن في الحالتين بيسبب خراب لبلاد المسلمين ...وبجد الله يكرمك ويوفقك ...وحسبنا الله ونعم الوكيل

    ردحذف
  11. لا وتصدقى كمان انا وف الامتحان
    يقولوا لى ايه
    ( ايمان من فك على مسلم كربة من كرب الدنيا فك الله عليه كربة من كرب يوما لقيامة )
    ( من غشنا فليس منا ومن غششنا غمنا )
    وكلام والله يضيقك ويخليكى تتعصبى اكتر
    طب والله كتير حالات غش بنلاقيها ف الامتحانات وكمان هى كتب وبراشيم وكدا والاساتذة يشوفهم ويقولوا كلمتين ف الهوا وخلاص ...

    وبارك الله فيكى بوست رائع جدا ومفيد
    وربنا يجعله ف ميزان حسناتك

    ردحذف
  12. أمون حبيبتي ..جزاك الله خير ونورتيني وللأسف أصبح الغش عند الناس من المسلمات بل من أسس التربية عند الأمهات..أختي مدرسة بتحكيلي إن الأمهات بتيجي تدفع فلوس للفراشين عشان يغششوا أولادها أو المدرسات يعملوا مشاكل عشان الطلاب الي معاهم في الدروس يتغششوا.. الموضوع ده للأسف أصبح جزء من ثقافة المجتمع كما ذكرت أختي نورالإسلام.. ومن دلائل فساد المجتمع

    ردحذف

قال تعالى (( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))

لنحيا بالقرآن..

TvQuran